Ўзбекистон Президентининг “Янги Ўзбекистон” газетасига интервьюси Туркия жамоатчилигида катта қизиқиш уйғотмоқда

Ўзбекистон Президентининг “Янги Ўзбекистон” газетасига интервьюси Туркия жамоатчилигида катта қизиқиш уйғотмоқда

АНҚАРА, 22 август. /“Дунё” АА/. Энг улуғ ва энг азиз байрам - мамлакатимиз мустақиллигининг 30 йиллигини муносиб нишонлашга қаратилган тадбирлар доирасида Туркиядаги элчихонамизда Президент Шавкат Мирзиёевнинг «Янги Ўзбекистон» газетасига интервьюсининг турк тилига ўгирилган матни тақдимоти ташкил этилди, деб хабар бермоқда “Дунё” ААнинг мухбири.

Туркия кенг жамоатчилик вакиллари, олимлар, тадбиркор ва ишбилармонлар иштирок этган тадбирда давлатимиз раҳбари интервьюсида қайд этилган асосий фикр ва мулоҳазалар ҳақида сўз юритилди.

Туркия Савдо палаталари ва биржалари иттифоқи ҳузуридаги Иқтисод ва технологиялар университети ректори, профессор Юсуф Саринай “Ўзбекистон Президентининг ҳар бир нутқи ва мурожаатини доимо катта қизиқиш билан қарши оламиз. Интервьюда Ўзбекистонда сўнгги беш йилда амалга оширилган ислоҳотлар, янгиланиш жараёнлари, демократик ютуқлар чуқур таҳлил қилинган,  “Янги Ўзбекистон” ва “Учинчи Ренесанс” каби улуғвор ғояларнинг моҳияти тўлиқ очиб берилган. Президентнинг Янги Ўзбекистонни бунёд этишга қаратилган даъватига бизнинг университет вакиллари ҳам “лаббай” деб жавоб беради. Ўтган йили Тошкентда очилган филиалимиз фаолияти билан ўзбек ёшларини замонавий илм-фан, илғор касб-ҳунарлар билан қуроллантириш йўлида камарбастамиз”, дея қайд этди.

Анқара Савдо-саноат палатаси кенгаши раиси Мустафа Дерял ҳам Президент Шавкат Мирзиёев интервьюсидан жой олган мулоҳазалар, хусусан, Ўзбекистонда ҳаётга тадбиқ этилаётган янгиланишлар ҳақидаги фикрларни юксак баҳолар экан, “Биз турк ишбилармонлар дунёсининг вакиллари ўлароқ Ўзбекистон Президентининг тадбиркорларга қаратилган алоҳида муносабати, инвесторларга юксак эътиборини доимо қадрлаймиз. Сўнгги беш йилда туркиялик тадбиркорларнинг Ўзбекистондаги фаолияти учун катта имкониятлар яратилгинини таъкидламоқчиман. Доимо маслакдошларимни Янги Ўзбекистон билан ҳамкорлик қилишга даъват этиб келаман. Элчихона вакиллари Ўзбекистон Президенти ўн мингга яқин тадбиркор иштирокида очиқ мулоқот ўтказгани, тадбиркорлик соҳасини қўллаб-қувватлаш бўйича янги вазифалар белгилагани ҳақида хабардор қилишди. Буларнинг барчаси биз, туркиялик тадбиркорларни ҳам Ўзбекистонга бўлган интилишимизни янада кучайтиради”.

Тадбир иштирокчилар элчихонада ташкил этилган “Ўзбекистон мустақиллигининг 30 йиллиги” номли фотокўргазма билан танишди.