СМТИ ва Туркиянинг «Marmara Grup» фонди ўртасида 2023 йилга мўлжалланган Қўшма тадбирлар режаси тасдиқланди

СМТИ ва Туркиянинг «Marmara Grup» фонди ўртасида 2023 йилга мўлжалланган Қўшма тадбирлар режаси тасдиқланди

ТОШКЕНТ, 15 декабрь. /«Дунё» АА/. Ўзбекистон Президенти ҳузуридаги Стратегик ва минтақалараро тадқиқотлар институтида (СМТИ) «Marmara Grup» ижтимоий ва стратегик тадқиқотлар фонди президенти Аккан Сувер бошчилигидаги туркиялик экспертлар делегацияси билан учрашув бўлиб ўтди, деб хабар бермоқда «Дунё» АА мухбири.

Мулоқот чоғида Ўзбекистон - Туркия муносабатларини чуқурлаштириш масалалари, Самарқандда бўлиб ўтган Туркий давлатлар ташкилоти саммитининг асосий натижалари атрофлича муҳокама қилинди.

Шунингдек, илмий-таҳлил марказлари ўртасидаги ҳамкорлик истиқболлари юзасидан ҳам ўзаро фикр алмашилди.

Тадбир иштирокчилари жорий йилда кенг қамровли стратегик шериклик даражасига кўтарилган Ўзбекистон - Туркия муносабатларининг бугунги ҳолатини юқори баҳолашди.

Икки давлат раҳбарлари ўртасида яқин ва ишончли мулоқот йўлга қўйилгани икки томонлама ҳамкорликни изчил ривожлантиришнинг асосий омили бўлаётгани алоҳида қайд этилди.

Учрашувда 2018 йили Истанбулда имзоланган СМТИ ва «Marmara Grup» фонди ўртасида имзоланган Англашув меморандумида белгиланган вазифаларни амалга ошириш бўйича 2023 йилга мўлжалланган Қўшма тадбирлар режаси тасдиқланди. Ҳужжат минтақа кун тартибининг энг долзарб масалалари бўйича қўшма тадбирларда иштирок этиш, нашрлар алмашуви ва икки томонлама онлайн конференциялар ўтказишни кўзда тутади.

Маълумот ўрнида қайд этиш жоизки, «Marmara Grup» стратегик ва ижтимоий тадқиқотлар фонди 1985 йилда Туркиянинг собиқ президенти Сулаймон Демирел кўмагида ташкил этилган жамоат ташкилоти ҳисобланади.