Фарғона шаҳри ва Туркиянинг Саричам тумани ўртасида ҳамкорлик битими имзоланди

Фарғона шаҳри ва Туркиянинг Саричам тумани ўртасида ҳамкорлик битими имзоланди

ТОШКЕНТ, 14 август. /«Дунё» АА/. Фарғона  вилояти ҳокимлигида Туркиянинг Адана вилояти Саричам тумани ҳокими Билал Улулағ бошчилигидаги делегация билан учрашув бўлиб ўтди, деб  хабар бермоқда  «Дунё» АА мухбири.

Вилоят  ҳокимлиги  маълумотига кўра, мулоқот давомида Фарғона ва Адана вилоятлари ўртасида ҳар томонлама ҳудудлараро ҳамкорлик алоқаларини кенгайтириш, Фарғона шаҳри ва Саричам тумани ўртасида савдо-иқтисодий, инвестицион, ижтимоий-маданий ҳамкорликни йўлга қўйиш масалалари муҳокама қилинди.

Фарғона  вилояти  ҳокими ўринбосари Иқболжон Эргашев вилоятнинг инвестицион, савдо-иқтисодий салоҳияти юзасидан меҳмонларга маълумот бериб, истиқболли ҳамкорлик йўналишларига эътибор қаратди.

Саричам туманида 1600 гектар майдонда 500 га яқин ишлаб чиқариш корхонасини ўзида бирлаштирган Туркиянинг энг йирик саноат зоналаридан бири бўлган Adana Hacı Sabancı бирлаштирилган саноат зонаси жойлашган бўлиб, фарғоналик тадбиркорлар билан қўшма инвестицион лойиҳаларни амалга ошириш имкониятлари юзасидан фикр алмашилди. 42 мингдан ортиқ иш ўрнига эга ушбу зонанинг йиллик экспорт ҳажмининг ўзи 1,7 миллард  долларни ташкил этади.

Инновацион ривожланишда бўлган Саричам ҳудудидаги Чуқурова университети, Фан ва технологиялар университети каби қатор олий таълим муассасалари билан Фарғона вилоятидаги олийгоҳлари ўртасида ҳамкорлик масалаларига ҳам тўхталиб ўтилди.

Мулоқот давомида Фарғона ва Адана шаҳарлари ўртасида мунтазам авиақатновларни йўлга қўйиш масалаларига  ҳам  эътибор қаратилди.

Учрашув якунида Фарғона шаҳар ҳокимлиги ва Саричам  тумани ўртасида ҳамкорлик алоқаларини ўрнатиш тўғрисида битим имзоланди.