Хоразм вилоят ҳокими бошчилигидаги делегация Туркиянинг Кожаэли вилоятидаги эркин иқтисодий зонасида яратилган имкониятлар билан танишди

Хоразм вилоят ҳокими бошчилигидаги делегация Туркиянинг Кожаэли вилоятидаги эркин иқтисодий зонасида яратилган имкониятлар билан танишди

ИСТАНБУЛ, 26 август. /«Дунё» АА/. Ўзбекистон Элчихонаси ва  Истанбулдаги Бош консулхонаси кўмагида Хоразм вилоят ҳокими Жўрабек Рахимов бошчилигидаги делегациясининг Туркиянинг Кожаэли вилоятидаги «Гебзе Гузеллер» эркин иқтисодий зонасига ташрифи  ташкил этилди, деб  хабар бермоқда «Дунё» АА мухбири.

Ташриф давомида Хоразм вилоятининг савдо-иқтисодий ҳамда инвестициявий салоҳиятига бағишланган бизнес- форум ва учрашувлар ўтказилди.

Бизнес-форумга Бирлашган эркин иқтисодий зоналар олий ташкилоти (OSBÜK) раҳбари ўринбосари, “Гебзе Гузеллер” эркин иқтисодий зонаси раҳбари Адем Жейлан, Кожаэли ва Истанбул савдо палаталари раҳбарлари, иқтисодий зонада фаолият юритаётган тадбиркорлар иштирок этишди. Шунингдек,  ушбу ҳудудда фаолият юритаётган Африка мамлакатлари, Хитой, Жанубий Корея ва бошқа хорижий инвесторлар ҳам қатнашдилар.

Тадбир давомида иштирокчиларга Ўзбекистоннинг инвестициявий салоҳияти, сўнгги йилларда иқтисодиётни либераллаштириш, солиқ  имтиёзлари,  хорижий сармоядорларни қўллаб-қувватлаш бўйича кўрилаётган чора-тадбирлар  ҳақида  батафсил маълумот берилди.  Шунингдек, мамлакатимизнинг экспорт имкониятлари ва халқаро транспорт-логистика масалалари хусусида фикр алмашинилди.

Форум савол-жавоб кўринишида давом этиб, турк тадбиркорларини қизиқтирган саволларга Хоразм вилояти мутасаддилари ва дипломатлар  томонидан батафсил жавоб берилди.

Бизнес-форумда бугунги кунда Хоразм вилоятида инвестициявий лойиҳаларни амалга  ошираётган  туркиялик  тадбиркорлар билан ҳамкорлик меморандумлари имзоланди.

Бундан  ташқари,  Хоразм вилояти ва  «Гебзе Гузеллер» ЭИЗ фаолият кўрсатаётган ишбилармонлар ўртасида В2В шаклида музокаралар ташкил этилди.

Шундан сўнг, мамлакатимиз делегация аъзолари «Гебзе Гузеллер» ЭИЗдаги ишлаб  чиқариш  корхоналари фаолияти билан танишдилар.