Turkiyadan munosabat: O'zbekiston Prezidentining Turkiy davlatlar tashkiloti sammitlaridagi ma'ruzalari TDT faoliyatini jadallashtirishga kuchli turtki beradi

Turkiyadan munosabat: O'zbekiston Prezidentining Turkiy davlatlar tashkiloti sammitlaridagi ma'ruzalari TDT faoliyatini jadallashtirishga kuchli turtki beradi

ANQARA, 7-noyabr. /"Dunyo" AA/. Yevroosiyo iqtisodiy aloqalari jamg'armasi "EkoAvrasya" boshqaruvi raisi Hikmet Eren "Dunyo" AA uchun intervyusida O'zbekiston Prezidenti Shavkat Mirziyoyevning 5-6-noyabr kunlari Bishkek shahrida bo'lib o'tgan Turkiy davlatlar tashkiloti (TDT) Davlat rahbarlari kengashining navbatdagi majlisidagi ishtiroki haqidagi fikrlarini bildirdi:

– O'zbekiston turkiy dunyoning muhim va ajralmas qismi bo'lib, Prezident Shavkat Mirziyoyevning Turkiy davlatlar tashkiloti sammitlaridagi har bir ishtiroki va ma'ruzalari TDT faoliyatida kuchli turtki beradi.

Bishkekda bo'lib o'tgan TDT sammiti chog'ida O'zbekiston yetakchisi so'nggi bir yilda yetakchi davlatlar o'rtasidagi raqobat va ishonchsizlik muhiti keskin kuchaymoqda, ziddiyat va urush o'choqlari ko'payib, turli xavf-xatarlar yana-da ortayotganiga alohida e'tibor qaratdi. Qayd etilganidek, Bu muammolar savdo, investitsiya, transport, energetika, qishloq xo'jaligi va boshqa sohalardagi qo'shma reja va katta loyihalarga jiddiy to'siq bo'lmoqda. O'zbekiston Prezidentining siyosat va xavfsizlik masalalari bo'yicha tizimli muloqotni davom ettirish, tashkilotga a'zo davlatlarning umumiy manfaatlaridan kelib chiqqan holda xalqaro muammolar bo'yicha yagona va aniq pozitsiyasini faol ilgari surish tashabbusi o'z vaqtida bo'ldi.

O'zbekiston rahbari o'z nutqida transport yo'laklaridan samarali foydalanishni ustuvor masala sifatida belgilab berdi. Shu bilan birga, O'rta yo'lak bo'ylab tranzit tariflarini optimallashtirish, chegaradan o'tish jarayonlarini soddalashtirish, zamonaviy logistika tizimlari va qo'shma operatorlarni yaratish ham muhim va ajralmas tarkibiy qism hisoblanadi.

Prezident Shavkat Mirziyoyevning tashkilot doirasida tashish jarayonida elektron hujjat aylanishiga o'tish va ularni o'zaro tan olish bo'yicha ko'p tomonlama shartnoma imzolash tashabbusi, shubhasiz, barcha a'zo davlatlar va TDT kuzatuvchi mamlakatlari tomonidan qo'llab-quvvatlanadi.

O'zbekiston rahbarining Turkiy davlatlar logistika markazlari va yuk tashuvchilar alyansi bilan birgalikda xalqaro biznes vakillari ishtirokida ushbu masalalarni batafsil muhokama qilish uchun Xalqaro logistika konferensiyasini o'tkazish to'g'risidagi taklifi ham juda dolzarbdir.

Ishonchim komilki, O'zbekiston Prezidenti tomonidan bildirilgan axborot texnologiyalari sohasida ilg'or tajriba va yutuqlarni almashish, innovatsiyalar, infratuzilma va ilm-fanning raqamli tizimlarini, yirik ma'lumotlar markazlarini yaratishga qaratilgan "Raqamli turkiy dunyo" konsepsiyasini ishlab chiqish taklifi TDT mamlakatlari taraqqiyotiga xizmat qiladi.