Туркиянинг нуфузли газетаси Имом Мотуридий халқаро илмий-тадқиқот маркази директори Жамолиддин Каримов билан бўлган суҳбатни чоп этди

Туркиянинг нуфузли газетаси Имом Мотуридий халқаро илмий-тадқиқот маркази директори Жамолиддин Каримов билан бўлган суҳбатни чоп этди

АНҚАРА, 18 январь. /“Дунё” АА/. Туркияда нашр этиладиган  нуфузли “Туркия” газетаси саҳифасида “Ёшлар учун нажот – Имом Мотуридий таълимотида” сарлавҳали интервью босилиб чиқди, деб хабар қилмоқда “Дунё” АА мухбири.

Ўзбекистондаги Имом Мотуридий халқаро илмий-тадқиқот маркази директори, тарих фанлари доктори Жамолиддин Каримов билан бўлган ушбу суҳбатда туркий халқлар ва ислом оламининг буюк олими Имом Мотуридий Имом-и Аъзам Абу Ҳанифа ҳазратлари томонидан нақл этилган “Аҳли суннат” эътиқодининг бутун дунёга тарқалишини таъминлагани хусусида атрофлича фикр юритилган.

Унда Ж.Каримов “Ёшларимизни турли адашган оқим ва гуруҳларнинг бузғунчи ҳаракатларидан асрашнинг чораси – ушбу улуғ алломамизни яқиндан таниш, унинг асарларини кенг тарғиб қилиш”дан иборатдир, деб айтган фикрларига алоҳида урғу берилган.

Маълумки, Имоми Аъзам Абу Ҳанифа нақл қилган ва ёзиб қолдирган “Аҳли суннат” ақидасига оид илмларни буюк туркий ва ислом олими Имом Мотуридий ўз асарларида шарҳлаб берган. Бузғунчи ва айирмачи ғояларга қўрғондек қарши турган бу улуғ аллома турли китоблар битиб,  кўплаб шогирдлар тайёрлаган ва “Аҳли суннат” эътиқодининг бутун дунёга тарқалишига имкон яратган.

Имом Мотуридий ҳаёти давомида ўз даври олимлари томонидан юксак қадрланган алломадир. У киши “Имому-л-мутакаллимин” – “Калом илми билимдонларининг пешқадами”, “Мусаҳҳиҳу ақоиди-л-муслимин” – “Мусулмонлар ақидасини тўғриловчи”, “Рофеъ аълому-ш-шариъа” – “Шариат байроқдори”, “Қолеъу абобили-л-фитна ва-л-бидъа” – “Фитна ва бидъат тўдаларини тўнтарувчи” каби шарафли номларга сазовор бўлган.

Юртдошимиз Жамолиддин Каримов Имом Мотуридий халқаро халқаро илмий-тадқиқот маркази фаолияти ҳақида маълумот берар экан, марказнинг асосий мақсади Имом Мотуридий ва у кишининг издошлари меросини чуқур тадқиқ қилиш, илм-фан ривожига қўшган ҳиссаларини ўрганиш ва кенг тарғиб қилишдан иборат эканлигини қайд этган. Марказда Мовароуннаҳр олимлари, хусусан, Имом Мотуридийнинг бой меросини ўрганиш мақсадида нашрлар чоп этилаётгани, симпозиум, давра суҳбатлари ташкил этилаётганини, шунингдек, Имом Мотуридий ҳақидаги маълумотларни оммалаштириш мақсадида турли аудио, видео ва инфографик материаллар, илмий мақолалар, китоблар, романлар, ҳужжатли ва бадиий филмлар тайёрлашга ҳам алоҳида эътибор қаратилаётганини маълум қилган.

Жамолиддин Каримов «Türkiye» газетасининг мухбири Мерйем Айбике Синаннинг (Meryem Aybike Sinan) ёш авлод Имом Абу Мансур Мотуридий ҳақида етарли маълумотга бўлиши учун қандай ишлар амалга оширилаётгани ҳақидаги саволига жавоб берар экан, турли фикрлар ва оқимлар кенг тарқалган бугунги кунда диний қадриятларимизни, айниқса, Имом Мотуридий ва унинг шогирдлари асарларини кенг тарғиб қилиш эҳтиёжи юксак эканлигини алоҳида таъкидлайди.

“Биз ёшларни ғаразли ғоялар ва таҳдидлардан асраш мақсадида Имом Мотуридий ҳамда унинг асарларини таржима қилиш ва нашр этиш борасида тизимли фаолият олиб бормоқдамиз. Ўз ишимизни интернет ва ижтимоий тармоқларда кенг тарғиб қилган ҳолда турли семинарлар ва викториналар ташкил этаётирмиз. Ҳанафий мазҳаби вакиллари бўлмиш буюк алломалар ҳаёти ва илмий мероси баён этилган “Буюк аждодларимиз”, “Мовароуннаҳрлик ўн мутакаллим”, “Мовароуннаҳрлик ўн фақиҳ”, “Мовароуннаҳрлик ўн муфассир” каби халқчил рисолалар ҳам чоп этилди”, дея таъкидлайди.

Шунингдек, ушбу интервьюда дунёдаги сохта оқимларнинг тарқалишини олдини олишда буюк алломанинг ҳаёт йўли қанчалик муҳимлиги, Имом Мотуридий халқаро илмий-тадқиқот марказининг Туркиядаги турдош ташкилотлар билан ҳамкорлик алоқалари, буюк аллома туркий давлатларнинг бир-бири билан алоқаларини мустаҳкамлашда муҳим ўрин тутишига  доир муҳим маълумотлар ҳам туркиялик газетхонларнинг эътиборига ҳавола қилинган.