Туркия авиакомпанияси 17 апрелдан бошлаб Тошкент ва Анқара шаҳарлари ўртасида ҳаво қатновларини амалга ошира бошлайди

Туркия авиакомпанияси 17 апрелдан бошлаб Тошкент ва Анқара шаҳарлари ўртасида ҳаво қатновларини амалга ошира бошлайди

АНҚАРА, 6 апрель. /«Дунё» АА/. Мамлакатимиз элчихонаси  ходимлари Туркиянинг «Анадолу Жет» авиакомпанияси бошқаруви кенгаши раиси Саид Шамил Каракаш билан учрашув ўтказдилар,  деб хабар  бермоқда «Дунё» АА мухбири.

Мулоқот  чоғида  Ўзбекистон ва Туркия ўртасидаги тўғридан-тўғри авиақатновлар сонини ошириш, бу борада лоукостер авиакомпанияларини кенг жалб этиш билан боғлиқ масалалар муҳокама қилинди.

 «Анадолу Жет» авиакомпаниясининг бошқарув кенгаши раиси Саид Шамил Каракаш жорий йил 17 апрелдан бошлаб Тошкент ва Анқара шаҳарлари ўртасидаги авиақатновларни ҳафтада бир маротаба амалга ошириш бошланишини маълум қилди.

Мазкур ҳаво қатновининг йўлга қўйилиши нафақат икки давлатнинг пойтахтларини бирлаштириши, балки туризм имкониятларини кенгайтириш ва савдо алоқалари учун янги имкониятлар очиши қайд этилди.

Томонлар ушбу авиакомпания томонидан Анқара-Тошкент ҳаво қатновини амалга оширадиган  биринчи самолётни  кутиб олиш бўйича тадбирларни юқори  савияда ташкил этишга келишиб олишди.

Маълумот учун: «Анадолу Жет» компанияси Туркиянинг «Turkish Airlines» авиакомпанияси таркибига кирувчи бренд ҳисобланади. Авиакомпания 2008 йилда ташкил этилган ва лоукостер авиақатновларини амалга оширишга ихтисослашган.

Бугунги кунда «Анадолу Жет»  авиакомпаниясининг 75 та самолёти мавжуд бўлиб, улар кўмагида 89 та шаҳарга 164 та ҳаво қатновлари амалга оширилмоқда.