Туркияда "Ўзбекистонга бориш учун 10 сабаб" номли рисола нашр этилди

Туркияда "Ўзбекистонга бориш учун 10 сабаб" номли рисола нашр этилди

АНҚАРА, 1 ноябрь. /"Дунё" АА/. Мамлакатимизнинг Туркиядаги элчихонаси ташаббуси билан "Ўзбекистонга бориш учун 10 сабаб" номли рисола турк тилида нашр этилди, деб хабар бермоқда "Дунё" АА мухбири.

Элчихонанинг туризм ва маданий-маънавий соҳадаги тарғибот-ташвиқот ишлари доирасида чоп қилинган ушбу рисолада бугунги кунда туризм соҳаси Янги Ўзбекистон ислоҳотларининг энг муҳим бўғинига айлангани алоҳида қайд этилган.

Диққатга сазовор жиҳати шундаки, Ўзбекистонга саёҳат учун 10 та сабаб алоҳида бўлимлар воситасида  ўқувчиларнинг эътиборига ҳавола қилингани ҳолда ҳар бир сарлавҳа остида камида 10 тадан мисол келтирилган.

Рисоланинг кириш қисмида мамлакатимиз элчиси Алишер Аъзамхўжаевнинг "Аслида ҳар бир турк қардошимизнинг Ўзбекистонга саёҳат қилиши учун биргина сабабнинг ўзи ҳам етарли эканини биламиз. Бу Ўзбекистоннинг улар учун "Ота Юрт" эканлиги билан изоҳланади. Инчунин, Сиз азиз қардошларимни ишонтириб айтаманки, ушбу мафтункор заминга қадам қўяр экансиз, ўзингизни ўз уйингиздагидек ҳис қиласиз, ҳатто ҳақиқий уйингизга қайтгандек ҳузур-ҳаловат топасиз", деган фикрлари баён этилган.

"Қадим шаҳарлар" номли биринчи сарлавҳа остида мамлакатимизнинг шонли тарихи ҳақида қисқача маълумот берилгани баробарида Янги Ўзбекистонда барпо этилаётган "Учинчи Ренессанс"нинг моҳияти ҳам очиб берилган. Унда, шунингдек, Самарқанд, Бухоро, Хива, Термиз, Шаҳрисабз, Қўқон, Наманган ва Нукус каби шаҳарларнинг сайёҳлик салоҳияти, бу ерлардаги осори-атиқалар ҳақида атрофлича ҳикоя қилинади.

Журналнинг иккинчи бўлими "Зиёрат туризми"га бағишланган бўлиб, унда мамлакатимизнинг мазкур йўналишдаги улкан салоҳиятига урғу берилган.

Рисоланинг бошқа бўлимлари "Буюк шахслар", "Беназир музейлар","Табиат ғаройиботлари", "Муҳташам фестиваллар", "Муштарак урф-одатлар","Мўл-кўл бозорлар", Ҳунармандчилик асарлари" ва "Мислсиз лаззатлар" деб номланган.

Мазкур рисола Туркияда Ўзбекистоннинг туризм салоҳиятини янада кенг тарғиб қилишга ҳамда ушбу мамлакатдан юртимизга сайёҳлар оқимини янада оширишга кўмаклашиши шубҳасиз.