O'zbekiston Respublikasining Turkiya Respublikasidagi Elchixonasining O'zbekiston Respublikasi Oliy Majlisining Qonunchilik palatasiga bo'lajak saylovlar bilan bog'liq press-relizi.

Маълумки, жорий йилнинг
22 декабрида Ўзбекистон Республикаси Олий Мажлисининг Қонунчилик палатаси депутатларини сайлови бўлиб ўтади.

Мазкур сайловларда хорижда истиқомат қилаётган барча ватандошларимиз учун овоз бериш имконияти яратилади. Чет элда вақтинча ёки доимий яшаётган Ўзбекистон фуқаролари ҳам хорижда ташкил этилган сайлов участкаларига мурожаат этади ёки Ташқи ишлар вазирлигининг расмий веб-саҳифасидан рўйхатдан ўтиб, сайловларда овоз бериши мумкин.

Хорижда вақтинча ва доимий яшаётган Ўзбекистон фуқаролари 2019 йил 22 декабрь куни бўлиб ўтадиган Олий мажлис қонунчилик палатаси ва маҳаллий кенгашлар депутатлари сайловига оид саволларига Марказий сайлов комиссиясининг Тошкент шаҳрида ўрнатилган +99855-502-44-44 рақамли ишонч телефони орқали жавоб олишлари мумкин.

Шунингдек улар “Saylov2019” мобил иловасидан ҳам маълумотлар олишлари мумкин.

Сайлов кодексининг 10-моддасига мувофиқ Ўзбекистон Республикасининг чет давлатлардаги дипломатик ва бошқа ваколатхоналари ҳузурида сайлов участкалари тузилиши, уларни округга бириктириш тўғрисидаги масала Марказий сайлов комиссияси томонидан ҳал этилиши белгилаб қўйилган. Ўзбекистон Республикасининг чет давлатлардаги дипломатик ва бошқа ваколатхоналари ҳузурида сайлов участкалари Ўзбекистон Республикаси Ташқи ишлар вазирлигининг тақдимномасига биноан Марказий сайлов комиссияси томонидан тузилади. Ушбу сайлов участкалари сайловга камида 60 кун қолганида, қоида тариқасида, сайловчилар сони камида йигирма нафардан ва кўпи билан уч минг нафардан ошмаган ҳолда ташкил этилади.

Ҳозирда Ўзбекистон Республикасининг хорижий давлатлардаги дипломатик ваколатхоналари ва консуллик муассасалари ҳузурида тузилган 53 та сайлов участкасини тегишли сайлов округларига бириктирилган. Шу жумладан, Туркиянинг Анқара шаҳрида Ўзбекистон элчихонаси қошида № 3 сонли, Истанбул шаҳарида эса, Ўзбекистоннинг Бош консулхонаси ҳузурида № 23 сонли сайлов участкалари тузилган. Мазкур икки участка ҳам № 148 сонли Тошкентдаги Кўкча сайлов округига бириктирилган.

Муҳтарам Президентимиз Шавкат Мирзиёев ташаббуси билан ишлаб чиқилган ҳамда “Инсон манфаатлари — ҳар нарсадан устун!” деган ҳаётбахш демократик ғояни ўзида мужассам этган янги Сайлов кодекси юртимизда сайловлар соҳасидаги ислоҳотларнинг янада юксалиш ва самарали даврини бошлаб берди. Кодекс сайловларимизнинг ошкоралик, шаффофлик, ҳаққонийлик, холислик каби демократик тартиб-тамойиллар асосида ўтишида муҳим омил бўлиши баробарида, сайловчи ва сайланувчилар учун кенг имкониятлар ва қулайликлар яратиб беради.