Туркиядан муносабат: «Dünya» газетаси истиқлолининг 30 йиллигини кенг нишонлаётган Ўзбекистон ҳақида таҳлилий мақола чоп этди

Туркиядан муносабат: «Dünya» газетаси истиқлолининг 30 йиллигини кенг нишонлаётган Ўзбекистон ҳақида таҳлилий мақола чоп этди

АНҚАРА, 4 сентябрь. /«Дунё» АА/. Туркиянинг «Dünya» газетаси саҳифасида Ўзбекистон мавзусига бағишланган «Ўзбекистон-Туркия стратегик муносабатларининг янги даври» сарлавҳали мақола босилиб чиқди, деб хабар бермоқда “Дунё” АА мухбири.

У истиқлолининг 30 йиллигини нишонлаётган Ўзбекистон бир вақтнинг ўзида икки муҳим жараённи бошдан кечираётгани, яъни “Янги Ўзбекистон” ва “Учинчи Ренессанс” атамалари мамлакатнинг мустақилликдан кейинги даврида ўтиш жараёнларининг ниҳояси ва янгидан уйғониш маъноларини ифода этиши, бу икки тушунча аслида ягона бир маррани - “Буюк Ўзбекистон” маъносини ифода этиши ҳақидаги фикрлар билан бошланади.

Мақолада “Янги Ўзбекистон” ғояси янгиланаётган дунё тизимида Ўзбекистоннинг мустаҳкам ўринни эгаллаш мақсадига қаратилган “янгидан туғилиш, янгидан уйғониш ҳаракати” сифатида ўзини намойиш этаётгани, шунингдек, Янги Ўзбекистоннинг 2016 йилдан буён амалга ошириб келаётган сиёсий ёндошувларида ҳамжиҳатлик ва жамоавий етакчилик, минтақавий фаровонлик, барқарорлик ва хавфсизликни таъминламасдан туриб глобал тинчлик ўрнатилмаслигига қаратилган ирода асос қилиб олингани қайд этилган.

“Президент Шавкат Мирзиёев узоқни кўзлаган, чуқур ўйланган, юксак мақсад кўзланган ва олий марраларга интилувчи раҳбарлик қобилияти билан ушбу жараёнларда бот-бот кўз ўнгимизда гавдаланмоқда”, деб ёзади нашр.

Мақолада 2016 йил Тошкент ва Анқара муносабатларининг янгидан жонланиши йили бўлиб қолгани ҳам қайд этилади. Газета икки мамлакат ўртасида имзоланган “Абадий дўстлик ва ҳамкорлик шартномаси” Шавкат Мирзиёевнинг 2016 йилда давлат раҳбарлигига келиши билан ҳақиқий маъносини топгани хусусида тўхталар экан, мамлакатларимиз ўртасидаги муносабатлар дастлабки 25 йилга кўра жадалроқ ва том маънода стратегик мазмун ва хусусиятга эга бўлганини қайд этади. “Ушбу жараён “Янги Ўзбекистон” ғоясининг етакчиси Шавкат Мирзиёев ҳамда Туркия Президенти Режеп Таййип Эрдоғаннинг саъй-ҳаракатлари билан тобора мустаҳкамланиб бормоқда. 2017 йилга келиб Тошкент-Анқара ҳамкорлиги “стратегик шериклик” даражасига кўтарилди”, деб ёзади нашр.

Мақолада Covid-19 пандемияси бутун жаҳон иқтисодига ўзининг салбий таъсирини кўрсатганига қарамасдан икки мамлакатнинг иқтисодий муносабатларини ўсишдан тўхтатамаганига ҳам урғу берилар экан, Туркия Ўзбекистоннинг тўртинчи савдо шериги сифатида ўз аҳамиятини сақлаб қолаётгани қайд этилади.

Юқоридагилар билан бирга ушбу салмоқли мақолада стратегик шериклик алоқаларининг истиқболи ва Афғонистон, Ҳамжиҳатликка асосланган кучли ташқи сиёсат, Ўзбекистон-Туркия стратегик ҳамкорлигининг маънавий-маърифий жиҳатлари,  “Янги Ўзбекистон” ғояси мустақилликнинг 30 йиллигида катта мазмун касб этаётгани сингари ўзаро ҳамкорлик қирралари ҳам атрофлича қаламга олинган.

Ушбу мақола сиёсатшунослик фанлари доктори, профессор, Анқара инқирозларни ўрганиш ва сиёсий тадқиқотлар марказининг раҳбари Сайфиддин Эрол қаламига мансуб.