Туркиядан муносабат: Янги Ўзбекистон кўп томонлама алоқаларни ривожлантириш ва амалий ҳамкорликни чуқурлаштиришга қатъий содиқлигини яна бир бор намойиш этди

Туркиядан муносабат: Янги Ўзбекистон кўп томонлама алоқаларни ривожлантириш ва амалий ҳамкорликни чуқурлаштиришга қатъий содиқлигини яна бир бор намойиш этди

АНҚАРА, 16 октябрь.  /«Дунё» АА/. Туркия эксперт-таҳлил ҳамжамияти Ўзбекистоннинг Мустақил Давлатлар Ҳамдўстлиги доирасидаги алоқаларини ривожлантириш бўйича ҳаракатларини катта қизиқиш билан кузатиб бормоқда. Ўзбекистон Президентининг МДҲ Давлат раҳбарлари кенгашининг юбилей мажлисида сўзлаган нутқи, айниқса, алоҳида қизиқиш  билан кутиб олинди, деб хабар бермоқда «Дунё» АА мухбири.

«Sahipkiran» стратегик тадқиқотлар маркази директори Месут Эмре Каракосе ўтган 30 йил давомида мавжуд қийинчиликларга қарамай, МДҲ ҳамкорликнинг аксарият йўналишларида салмоқли натижаларга эришганини таъкидлади.

Туркиялик эксперт Ўзбекистон Президенти томонидан МДҲ доирасидаги ҳамкорликни янада жадал ривожлантириш бўйича билдирилган ташаббус ва таклифлар қабул қилинган стратегик ва концептуал ҳужжатларни амалда жорий этиш ҳамда Ҳамдўстлик салоҳиятидан максимал даражада фойдаланишга қаратилганини қайд этди.

У шунингдек,  мамлакатимиз раҳбарининг ташаббуслари барқарор ва прогрессив ривожланишни таъминлаш, шунингдек, МДҲга аъзо давлатлар ўртасидаги иқтисодий, маданий-гуманитар ҳамкорликни мустаҳкамлашда ҳам янги саҳифа очишини таъкидлади.

Турк таҳлилчисининг айтишича, Янги Ўзбекистон кўп томонлама алоқаларни ривожлантириш ва ўзаро ҳамкорликнинг барча соҳаларида амалий шерикликни чуқурлаштириш борасидаги қатъий мажбуриятини яна бир бор тасдиқлади.

- Ўзбекистон раҳбари ўз нутқида «яшил» иқтисодиётни ривожлантириш, рақамлаштириш, саноат кооперацияси ва инновациялардан кенг фойдаланиш, шунингдек, халқаро транспорт йўлакларини ривожлантириш, мавжуд табиий-иқтисодий ресурслардан комплекс ва оқилона фойдаланиш орқали барқарор иқтисодий ўсишга қаратилган саъй-ҳаракатларни кучайтириш зарурлигига эътибор қаратди, - деди Месут Эмре Каракосе. - Кичик ва ўрта бизнесни қўллаб-қувватлаш, бандликка кўмаклашиш тизимини такомиллаштириш, иштирокчи мамлакатларда меҳнат фаолияти билан шуғулланувчи МДҲ мамлакатлари фуқаролари учун қулай шарт-шароитлар яратиш, шунингдек, минтақавий ҳамкорликни ошириш бўйича таклифлар МДҲга аъзо барча давлатлар иқтисодиётининг ривожланишига хизмат қилади.

Бундан ташқари, Туркия таҳлил маркази директори Ўзбекистон хавфсизлик соҳасидаги ҳамкорликни чуқурлаштириш ва замонавий таҳдидларга - халқаро терроризм, экстремизм, трансчегаравий уюшган жиноятчилик, эпидемиологияга қарши курашиш масалаларига алоҳида эътибор қаратаётгани жуда муҳим эканини билдирди.

Шу нуқтаи назардан, МДҲ давлат раҳбарлари томонидан биологик хавфсизлик соҳасидаги ҳамкорлик тўғрисидаги баёнотнинг қабул қилиниши, шубҳасиз, аҳолининг санитария-эпидемиологик фаровонлиги ва соғлиқни сақлаш соҳасида МДҲ маконини хавфли биологик омиллар таъсиридан холи ҳудудга айлантиришда ижобий омил бўлиб хизмат қилади.

Месут Эмре Каракосе Ўзбекистон Президенти томонидан илгари сурилган ташаббусларнинг амалга оширилиши иқтисодий тараққиётга эришиш ва минтақавий хавфсизликни таъминлашга хизмат қилишига ишонч билдирди.