Анқарада Туркия ва Ўзбекистон ўртасида дипломатия муносабатлари ўрнатилганлигининг 30 йиллигига бағишланган семинар бўлиб ўтди

Анқарада Туркия ва Ўзбекистон ўртасида дипломатия муносабатлари ўрнатилганлигининг 30 йиллигига бағишланган семинар бўлиб ўтди

АНҚАРА, 20 февраль. /«Дунё» АА/. Мамлакатимизнинг Туркиядаги элчихонаси Анқарада жойлашган Стратегик тафаккур институти билан ҳамкорликда “Ўзбекистон ва Туркия ўртасидаги дипломатия муносабатларининг  30 йиллиги: Абадий дўстлик ва стратегик ҳамкорлик” мавзусига бағишланган семинар ташкил этди, деб хабар бермоқда “Дунё” АА мухбири.

Анқара шаҳрида дипломатия йўналишида таълим олаётган 60 нафардан зиёд хорижлик талаба ва тадқиқотчилар иштирокида уюштирилган ушбу тадбирда дўстлик, ўзаро ҳурмат ва қардошликка асосланган ўзбек-турк муносабатларининг тарихий асослари ҳақидаги атрофлича маълумотлар тилга олинди.

Тадбирда ўзаро муносабатларнинг сўнгги беш йилига алоҳида эътибор қаратилар экан, бу давр энг намунали босқич сифатида тарихда қолиши қайд этилди. “2017 йил октябрь ойида Ўзбекистон Президентининг Туркияга амалга оширган расмий ташрифи кўп жиҳатдан ушбу тарихий саҳифа очилишининг ибтидосидир.  Стратегик алоқаларимизнинг асослари ўрнатилган ушбу ташрифга бу йил беш йил тўлишини алоҳида таъкидлаш мақсадга мувофиқдир”, - деб таъкидлади анжуман иштирокчилари.

Семинар чоғида икки давлат ўртасида тобора юксалиб бораётган савдо-иқтисодий муносабатлар, уларнинг кўрсаткичлари, ўзбек-турк алоқаларининг мавжуд ҳолати ва истиқболлари ҳақидаги маълумотлар ҳам тақдим этилди. Шу ўринда икки давлат ўртасидаги муносабатлар изчиллигида бевосита Президентлар раҳбарлигида тузилган Олий даражадаги Ўзбекистон-Туркия стратегик ҳамкорлик кенгаши тузилмаси катта аҳамият касб этаётгани, илк мажлиси 2020 йил 19-20 февраль кунлари Анқарада бўлиб ўтган мазкур Олий даражали кенгашнинг навбатдаги саммити яқин фурсатларда Тошкентда бўлиши кутилаётгани қайд этилди.