Туркиядан муносабат: Сердар Бердимуҳамедовнинг Ўзбекистонга давлат ташрифи кўп қиррали Ўзбекистон-Туркманистон ҳамкорлигининг барча соҳаларида стратегик шериклик муносабатларни янада юқори босқичга олиб чиқди

Туркиядан муносабат: Сердар Бердимуҳамедовнинг Ўзбекистонга давлат ташрифи кўп қиррали Ўзбекистон-Туркманистон ҳамкорлигининг барча соҳаларида стратегик шериклик муносабатларни янада юқори босқичга олиб чиқди

АНКАРА, 16 июль. /“Дунё” АА/. Туркманистон Президенти Сердар Бердимуҳамедовнинг Ўзбекистонга давлат ташрифи натижалари бўйича Анқара инқирозлар ва сиёсат тадқиқотлари маркази (АНКАСАМ) раҳбари профессор Меҳмет Сейфеттин Эрол  ўз фикр-мулоҳазаларини билдирди.

–   Аввало шуни таъкидлаш жоизки, Сердар  Бердимуҳамедовнинг давлат раҳбари этиб сайлангандан кейин Ўзбекистонга илк давлат ташрифининг аҳамияти юқоридир. Бу ўзбек ва туркман халқлари ўртасидаги азалий дўстлик ва ишончнинг, юзлаб асрларга даҳлдор қардошлик ришталарининг ифодасидир.

Тарихга назар солинса, туркий давлатлар тарихида ўзбек ва туркман эллари доимо елкама-елка, ҳамкор ва кўмакдош бўлганини кўрасиз. Ушбу тарихий воқелик ҳар икки мамлакатнинг истиқлол йилларида янада мустаҳкамлангани эътиборга молик. Эсингизда бўлса, 2017 йил Ўзбекистон Президенти Шавкат Мирзиёевнинг илк хорижий ташрифи айнан Турманистонга бўлган эди. Икки мамлакат ўртасидаги яқинликни ифодалаш учун бундан ортиқ мисол бўлмаса керак.

Умуман олиб қараганда, сўнгги йилларда Марказий Осиёда ҳамкорликни ривожлантириш ташаббускори ўлароқ Ўзбекистоннинг мавқеи тобора ортиб бораётганига гувоҳ бўлмоқдамиз. Туркманистон Президентининг Ўзбекистонга ташрифи давомида ҳам буни яққол кўрдик. Бу каби самимий ва яхши қўшничилик алоқалари ўзаро манфаат келтираётгани сир эмас. Кейинги йилларда икки давлат ўртасидаги товар айирбошлаш ҳажми 5 баробарга ошгани, чегара савдо зонасини ташкил этиш бўйича эришилган келишувлар, ўзаро савдо-саноат кооперациясини ривожлантириш бўйича қўйилган марралар, ҳақиқатан ҳам, тарихий аҳамиятга молик бўлган Амударё сув ресурсларидан фойдаланиш бўйича имзоланган шартнома – буларнинг барчаси ўзбек-туркман муносабатларининг нақадар тараққий этганини кўрсатиб турибди.

Сўнгги вақтларда Ўзбекистонга амалга оширилаётган олий даражадаги, айниқса, қардош мамлакат раҳбарларининг ташрифларида бир жиҳат эътиборимни алоҳида тортмоқда. Делегациялар учун расмий дастурлардан ташқари тарихий шаҳарларни зиёрат қилиш ҳам яхши анъанага айланиб бормоқда. Буни биз Туркия, Тожикистон ва Озарбайжон раҳбарларининг Хивага ташрифида гувоҳ бўлдик. Туркманистон Президенти учун эса қадим ва навқирон Самарқандда ўзгача меҳмондўстлик кўрсатилди. Бу каби дастурларлар қардош мамлакатларнинг умумий қадриятларини англашда, туркий дунёда Ўзбекистоннинг ролини идрок этишда жуда муҳим.

Бир сўз билан айтганда, Сердар Бердимуҳамедовнинг Ўзбекистонга давлат ташрифи кўп қиррали Ўзбекистон-Туркманистон ҳамкорлигининг барча соҳаларида стратегик шериклик муносабатларни янада юқори босқичга олиб чиқди, дейиш мумкин.