Туркиянинг Кайсери вилоятида Ўзбекистоннинг савдо-иқтисодий, инвестиция ва сайёҳлик салоҳияти тақдим қилинди

Туркиянинг Кайсери вилоятида Ўзбекистоннинг савдо-иқтисодий, инвестиция ва сайёҳлик салоҳияти тақдим қилинди

АНҚАРА, 29 сентябрь. /«Дунё» АА/. Ўзбекистоннинг Туркиядаги элчихонаси дипломатлари амалий сафар билан ушбу мамлакатнинг Кайсери вилоятида бўлишди, деб хабар бермоқда «Дунё» АА мухбири.

Сафар давомида Кайсери вилояти губернатори ўринбосари Абдуллаҳ Калкан, мэрия бош котиби Ҳусейн Бейхан, савдо палатаси раиси Омер Гюлсой, саноат палатаси бошқаруви кенгаши аъзоси Неби Доған билан учрашувлар уюштирилди.

Вилоятнинг 30 га яқин етакчи саноат компаниялари раҳбарлари иштирокида Ўзбекистоннинг савдо-иқтисодий, инвестиция ва сайёҳлик салоҳиятига бағишланган тақдимот ўтказилди. Шунингдек, «Sersim», «Boyteks Group», «Mundo Group» ва «Yataş Holding» компаниялари билан саноат кооперацияси усули орқали қўшилган қиймат занжирларини яратиш ва Ўзбекистон ҳудудида қўшма лойиҳаларни амалга ошириш истиқболлари атрофлича муҳокама қилинди.

Бўлиб ўтган учрашувлар натижасида Кайсери вилоятининг  туризм агентликлари ҳамда етакчи саноат компаниялари вакилларидан иборат делегациянинг Ўзбекистонга сафарини уюштиришга келишиб олинди.

 Маълумот учун: Кайсери вилояти саноатининг асосини тўқимачилик, электротехника, мебелсозлик ва машинасозлик жабҳалари ташкил қилади. Вилоятда жами 25 мингдан ортиқ тадбиркорлик субъектлари рўйхатдан ўтган. Ҳудудда 4 та саноат ва эркин иқтисодий зоналар фаолият кўрсатади. 2021 йил якунларига кўра, Туркиянинг ушбу минтақасидан  жами 3,6 миллиард  АҚШ долларига тенг маҳсулот экспорт қилинган.