Истанбулда турк ва ўзбек тадбиркорлари билан мулоқот ташкил этилди

Истанбулда турк ва ўзбек тадбиркорлари билан мулоқот ташкил этилди

ИСТАНБУЛ, 18 ноябрь. /«Дунё» АА/. Мамлакатимиз Бош консулхонаси томонидан Истанбул шаҳрида Ўзбекистон билан яқин ҳамкорлик қилаётган ишбилармон доира вакиллари ва ушбу ҳудудда тадбиркорлик билан шуғулланаётган ватандошлар билан учрашув ўтказилди, деб  хабар бермоқда «Дунё» АА мухбири.  

Тадбир «Ўзбекистон маданияти, бирдамлик ва ҳамкорлик» ва «Халқаро ўзбек саноатчилари, тадбиркор ва илм инсонлари» жамиятлари билан ҳамкорликда ташкил этилди.  

Бош консулхона ходимлари иштирокчиларни Ўзбекистонда амалга оширилаётган иқтисодий ўзгаришлар, хорижий инвесторларга яратиб берилаётган шарт-шароитлар ва уларнинг манфаатларини ҳимоя қилиш бўйича қабул қилинаётган фармон ҳамда қарорларнинг мазмун-моҳияти билан таништиришди.

Тадбирга келганларга Ўзбекистон иқтисодиёти ва инвестициявий лойиҳалар ҳақидаги материаллар тарқатилди.  

Ўзбекистонда тадбиркорлик билан шуғулланаётган Туркия вакиллари ўз фаолиятлари ҳақида гапириб беришди ва ватандошларини мамлакатимизга сармоя киритишга чақиришди.

Учрашув якунида Бош консулхона билан яқиндан ҳамкорлик қилиб келаётган бир гуруҳ тадбиркорларга ташаккурнома ва эсдалик нишонлари топширилди.