Elchixona bilan bog'lanish
telefoni
Konsullik masalalari bo'yicha
telefoni

Turkiyada atoqli qoraqalpoq shoiri Ajiniyoz Qo'siboy o'g'li tavalludiga bag'ishlangan "Ma'naviy olam kuychisi" mavzusida konferensiya o'tkazildi


Turkiyada atoqli qoraqalpoq shoiri Ajiniyoz Qo'siboy o'g'li tavalludiga bag'ishlangan "Ma'naviy olam kuychisi" mavzusida konferensiya o'tkazildi

ISTANBUL, 7-dekabr. /"Dunyo" AA/. Mamlakatimiz Bosh konsulxonasi ko'magida shu yilning 2-5-dekabr kunlari Qoraqalpog'iston Respublikasi Vazirlar Kengashi raisining o'rinbosari Rasul Zarikeyev boshchiligidagi delegatsiyaning Turkiyaga tashrifi tashkil etildi, deb xabar qilmoqda "Dunyo" AA muxbiri.

Tashrif davomida Qoraqalpog'iston Respublikasi Vazirlar Kengashi Raisining o'rinbosari Rasul Zarikeyev Istanbul madaniyat va turizm boshqarmasi rahbari Joshkun Yilmaz bilan uchrashuvi o'tkazdi. Unda Qoraqalpog'istonning turizm salohiyatini targ'ib qilishda hamkorlikni yo'lga qo'yish tajriba almashish masalalari muhokama qilindi.

 

Turk tomoniga O'zbekistonga tashrif buyuruvchi turistlar uchun Istanbul-Nukus reyslaridan foydalangan holda "Nukus-Xiva-Buxoro-Samarqand" yo'nalishida samarali va iqtisodiy jihatdan maqbul turistik dasturni tashkil etish imkoniyati mavjudligi bildirildi.

 

Joshkun Yilmaz bu yo'nalishda o'zaro manfaatli hamkorlikni rivojlantirishga tayyorligini tasdiqladi.

 

Safar davomida Istanbul universitetida Ajiniyoz Qo'siboy o'g'li tavalludining 200 yilligiga bag'ishlangan "Ma'naviy olam kuychisi" mavzusida amaliy konferensiya o'tkazildi.

 

Anjuman ishtirokchilariga O'zbekiston Prezidentining "Atoqli qoraqalpoq shoiri va mutafakkiri Ajiniyoz Qo'siboy o'g'li tavalludining 200 yilligini keng nishonlash to'g'risida"gi qarorining mazmun-mohiyati va ahamiyati haqida batafsil so'zlab berildi. 

 

Istanbul universiteti va Qoraqalpog'istondan tashrif buyurgan olimlarning buyuk shoirning adabiy merosi, uning turkiy xalqlar adabiyoti va madaniyatiga qo'shgan ulkan hissasi haqida ma'ruzalari tinglandi.

 

"Turksoy" xalqaro turkiy madaniyat tashkiloti bo'lim boshlig'i Sanjar Mo'lazimo'g'lu o'z so'zida, Ajiniyoz Qo'siboy o'g'li tavalludining 200 yilligini nishonlash YUNESKO xalqaro yubileylar rejasiga kiritilgani, shoir ijodiga dunyo miqyosida katta e'tibor qaratilayotganidan dalolat ekanini ta'kidladi.

 

Istanbul shahri Bag'jilar tumani hokimiyati san'at saroyida O'zbekiston san'at ustalari ishtirokida "Ayt sen, Ajiniyozning qo'shiqlaridan" madaniy-ma'rifiy kecha tashkil etildi.

 

Unda Istanbul shahrida vaqtincha va doimiy istiqomat qilayotgan vatandoshlar, Turkiya davlat idoralari vakillari, madaniyat va ta'lim sohasi mutaxassislari, tadbirkorlar, jamoat tashkilotlari rahbarlari hamda turizm sohasi vakillari qatnashdi.

 

Shu o'rinda ta'kidlash kerakki, Istambulda Atoqli qoraqalpoq shoiri va mutafakkiri Ajiniyoz Qo'siboy o'g'li tavalludiga bag'ishlab o'tkazilgan tadbirlar O'zbekiston va Qoraqalpog'iston adabiyoti, madaniy va ma'naviy qadriyatlarini keng targ'ib qilish, vatandoshlar o'rtasida milliy hamjihatlikni mustahkamlash, madaniy diplomatiyaning yorqin namunasi sifatida o'rin oldi.