Yangi O'zbekistonning yangilangan Konstitutsiyasida "Inson qadri uchun" tamoyili ustuvor

Yangi O'zbekistonning yangilangan Konstitutsiyasida "Inson qadri uchun" tamoyili ustuvor

ANQARA, 8-dekabr /"Dunyo" AA/. Mamlakatimizning Turkiyadagi elchixonasida 8-dekabr – O'zbekiston Konstitutsiyasi qabul qilingan kun munosabati bilan "Yangi O'zbekiston – yangi marralar sari" mavzusida madaniy-ma'rifiy tadbir bo'lib o'tdi, deb xabar qilmoqda "Dunyo" AA muxbiri.

Anqara inqiroz va siyosat tadqiqotlari markazi "ANKASAM" bilan hamkorlikda tashkil etilgan tadbirda diplomatlar, yetakchi turk universitetlari professor-o'qituvchilari ishtirok etdi.

Elchi Alisher A'zamxo'jayev o'z nutqida, Bosh qomusimizning qabul qilinish tarixi, 2023-yildagi referendum orqali kiritilgan o'zgarishlar, so'nggi parlament saylovlari natijalari haqida to'xtalib o'tdi. Konstitutsiya –davlatchiligimizning huquqiy asosini tashkil etishi, aholi soni 36 milliondan oshgan mamlakatimizda har bir fuqaroning huquq va erkinliklarini kafolatlovchi hujjat ekani ta'kidlandi.

Shu yil oktyabr oyida bo'lib o'tgan parlament saylovlarining yangi Konstitutsiyamizga muvofiq tashkil etilgani, kelgusi 5 yil uchun belgilab olingan muhim vazifalar alohida urg'ulandi.

Professor Mehmet Seyfettin Erol, "ANKASAM" tahlil markazi direktori:

– Barcha o'zbek xalqini, aziz qardoshlarimizni 8-dekabr – Konstitutsiya kuni bilan samimiy tabriklayman. Men o'tgan yil bo'lib o'tgan Konstitutsiyaga o'zgartishlar kiritish bo'yicha referendumda xalqaro kuzatuvchi sifatida qatnashgan edim. O'shanda xalqingizni Asosiy qonunga bo'lgan hurmatini yaqindan his qildim. O'zbek xalqi Yangi O'zbekiston g'oyasining huquqiy poydevori bo'lgan hamda aholi va davlat hamjihatligini mustahkamlagan yangilangan Konstitutsiyaning qabul qilinishini baralla qo'llab-quvvatladi.

Asosiy qonunda mustahkamlab qo'yilgan demokratik asoslar bu yilgi parlament saylovida o'z natijasini ko'rsatdi. Konstitutsiya asosida Yangi O'zbekiston demokratiya namunasi sifatida maydonga chiqib, erkin bozor tartiboti sog'lom faoliyat yuritadigan kuchli iqtisodiyot modeliga aylanib bormoqda.

Jem Karadeli, Ufuq universiteti professori:

– Yangi O'zbekistonning yangilangan Konstitutsiyasi tom ma'noda Prezident Shavkat Mirziyoyevning "Inson qadri uchun", "Xalq davlat idoralariga emas, davlat tashkilotlari xalqqa xizmat qilishi zarur" g'oyalarini o'zida mujassam etgan. Yaqinda bo'lib o'tgan parlament saylovida ham ko'rdikki, O'zbekistonda Konstitutsiyadagi yangi o'zgarish asosida kuchli parlament tomonidan qo'llab-quvvatlanadigan demokratlashuv muhiti yanada mustahkamlanmoqda. Mamlakatda inson kapitalini eng muhim manba sifatida ko'radigan va muvofiq ravishda inson qadr-qimmatiga ustuvorlik beradigan islohotlar siyosati jadallik bilan davom etmoqda. Kelgusi besh yil uchun muhim vazifalar belgilab olgan Yangi O'zbekiston islohotlar bosqichida puxta, qat'iy va muvaffaqiyatli amalga oshiriladigan yangi jarayonga qadam qo'ydi. Fursatdan foydalanib, O'zbekiston xalqini Konstitutsiya kuni bilan samimiy tabriklayman.