Istanbul shahrida o'zbekistonlik ayollarni qo'llab-quvvatlash va huquqlarini himoya qilish doirasida tadbir bo'lib o'tdi

Istanbul shahrida o'zbekistonlik ayollarni qo'llab-quvvatlash va huquqlarini himoya qilish doirasida tadbir bo'lib o'tdi

ISTANBUL, 24-dekabr. /"Dunyo" AA/. Mamlakatimiz Bosh konsulxonasi va Istanbulda faoliyat yurituvchi "O'zbek xotin-qizlari huquqlarini himoya qilish jamiyati" hamkorligida "Yil ayoli – 2024" va "Diydor shirin" nomli madaniy-ma'rifiy kecha tashkil etildi, deb xabar qilmoqda "Dunyo" AA muxbiri.

Tadbir Turkiyada yashab kelayotgan o'zbekistonlik ayollar va xotin-qizlarni birlashtirish hamda ularni qo'llab-quvvatlash maqsadida o'tkazilib, unga Istanbul shahrida vaqtincha va doimiy istiqomat qilayotgan vatandoshlar, davlat idoralari vakillari, jamoat tashkilotlari rahbarlari vakillari tashrif buyurdi.

Madaniy-ma'rifiy dastur doirasida Turkiyaga turli sabablarga ko'ra kelgan, hayotida va farzand tarbiyasida o'rnak bo'la olgan, shuningdek, jamiyatda muvaffaqiyatga erishgan fidoyi o'zbek xotin-qizlari turli nominatsiyalar bo'yicha sovrin va esdalik sovg'alari bilan taqdirlandilar.

Mehmonlar uchun bayramona dasturxon yozilib, o'zbek milliy taomlari va turli noz-ne'matlar ulashildi. Shuningdek, jonli ijroda kuy-qo'shiqlar ijro etildi.

Tadbir o'zbekistonlik ayollarning ilm-ma'rifati, ma'naviyati va salohiyatini hamda ularning xorijdagi o'rnini namoyon etish uchun mustahkam asos bo'lib xizmat qildi.