Istanbul shahrida O'zbekiston yoshlarining navbatdagi forumi o'tkazildi

Istanbul shahrida O'zbekiston yoshlarining navbatdagi forumi o'tkazildi

ISTANBUL, 26-dekabr. /"Dunyo" AA/. Istanbul shahrida O'zbekiston Yoshlar ishlari agentligi, Yoshlar umumjahon assotsiatsiyasining vakili va Turkiyadagi bir nechta universitetlar bilan hamkorlikda yoshlar Forumi tashkil etildi, deb xabar qilmoqda "Dunyo" AA muxbiri.

Tadbirda Yoshlar ishlari agentligi direktori Alisher Sa'dullayev, Yoshlar ittifoqi rahbari Xayrulla Sattarov, Yoshlar umumjahon assotsiatsiyasi raisi Otabek Shavkatbekovlar onlayn shaklda, bosh konsul Sherzod Abdunazarov, Turkiyadagi "Gençkon" itashqiloti rahbari Axmet So'zbilir, "GençMUSIAD" markazi raisi Mexmet Kuchuk, Turkiya Atrof muhit agentligi boshqarma boshlig'i Deniz Demir va boshqalar notiq sifatida ishtirok etishdi.

Forumni o'tkazishdan maqsad – Turkiyada tahsil olayotgan va mehnat faoliyatini amalga oshirayotgan O'zbekiston yoshlari uchun keng imkoniyatlar yaratish, yangi g'oyalar va tashabbuslarni qo'llab-quvvatlash bo'ldi.

Tadbir to'rt panelga bo'lingan holda o'tkazildi — "Barqaror rivojlanish: yurtimiz va dunyoda barqaror rivojlanish, ekologik muammolar, yashil iqtisodiyot va ijtimoiy mas'uliyat";

"Frilans va ish imkoniyatlari: talabalar va yoshlar uchun onlayn ish topish, frilans faoliyatini yuritish va biznes yaratish"; "Talabalar ijtimoiy muammolari: Turkiyada tahsil olayotgan o'zbekistonlik talabalar duch kelayotgan ijtimoiy, iqtisodiy va madaniy muammolarni muhokama qilish"; "Doktorantlar uchun maxsus sessiyalar".

Tadbir davomida O'zbekiston Yoshlar ishlari agentligi, Turkiya YTB (Xorijdagi turklarni qo'llab quvvatlovchi jamg'arma), diasporamiz vakillari homiyligida sovrin va sovg'alar taqdim etildi.

Shuningdek, mamlakatimizning madaniy merosi va boy oshxonasi namoyish etildi. Yoshlarni bilim olishlari va kitob o'qishga qiziqtirish maqsadida o'zbek tilidagi kitoblar ham tarqatildi.

Diplomatlar vatandoshlarimiz bilan suhbatlar tashkil etib, ularni qiziqtirgan konsullik-huquqiy, ijtimoiy-madaniy va boshqa yo'nalishlardagi savollariga javob berishdi.