Рассомларимиз ўртасидаги ижодий алоқалар янада ривожланади

Рассомларимиз ўртасидаги ижодий алоқалар янада ривожланади

Жорий йил 17-21 апрель кунлари Ўзбекистон Бадиий академияси ва қатор вазирлик, ташкилотлар ҳамкорлигида республикамиз бўйлаб Халқаро анъанавий Тасвирий ва амалий санъат фестивали ўтказилмоқда.

Мазкур фестиваль – санъат аҳли учун том маънода катта байрам. Чунки фестиваль миллий тасвирий ва амалий санъатимиздаги ютуқларни халқимиз ҳамда жаҳон ҳамжамиятига тақдим этиш, хорижлик рассомлар, усталар билан ижодий алоқаларни янада ривожлантиришга қаратилган.  

Ўзбекистон Бадиий академияси ташаббуси билан жорий йилги фестивалда биринчи марта Халқаро туркий маданият ташкилоти – ТУРКСОЙ ташкилотига аъзо мамлакатлар рассомларининг “Турк дунёси рассомларининг учрашуви” номли кўргазмаси ташкил қилинди. ТУРКСОЙнинг 30 йиллигига бағишланган ушбу кўргазмада ташкилотга аъзо барча давлатлар – Озарбайжон, Туркия, Туркманистон, Қозоғистон, Қирғизистон билан биргаликда Венгриядан жами 20 нафар рассом ўз асарлари билан иштирок этмоқда.  

Турк дунёси рассомчилик санъатини танитиш, рассомларимиз ўртасидаги алоқаларни яхшилаш ҳамда тажриба алмашиш имкониятини бериш мақсадида 25 йилдан бери “ТУРКСОЙ рассомлар учрашуви” ташкил қилинмоқда.  

Умумий маданиятимизни тарғиб қилиш, ривожлантириш, танитиш, умуминсоний маданият, санъат ичида ўз ўрнига эга бўлиш ва келажак авлодларга етказиш учун изланишлар олиб бораётган ТУРКСОЙ, ушбу мақсадга эришиш учун рассомларимиз кўмагига таяниб ҳамжиҳатликда  тадбирлар ўтказиб келмоқда. Бугунги кунга қадар кўплаб ўзбек рассомлари “ТУРКСОЙ рассомлар учрашуви” санъат тадбирида Ўзбекистон номидан иштирок этди, айримлари ТУРКСОЙ мукофотини қўлга киритди.  

Ўзбекистон Тасвирий санъат галереясида ташкил этилган кўргазма  экспозициясидан ўрин олган асарлар ҳам “Турк дунёси рассомларининг учрашуви” деган умумий номга муштаракдир. Кўргазма ҳам умумий маданиятимизни тарғиб этиш, рассомларимиз ўртасидаги ижодий алоқаларни янада кучайтириш, ҳамжиҳатликни таъминлаш, мулоқот юритишга хизмат қилади.  

Н.Усмонова, ЎзА