Истанбулда ўзбек кураши бўйича халқаро турнир ва миллий анъаналар кўргазмасини ташкил этиш масалалари муҳокама қилинди

Истанбулда ўзбек кураши бўйича халқаро турнир ва миллий анъаналар кўргазмасини ташкил этиш масалалари муҳокама қилинди

ИСТАНБУЛ, 24 май. /«Дунё» АА/. Ўзбекистон Бош консулхонада «Истанбул маданият ва санъат маҳсулотлари савдоси» жамияти вакиллари Мехмет Аккая, Айше Чағлаян ва Абдулметин Кескин билан учрашув бўлиб ўтди, деб хабар бермоқда  «Дунё» АА мухбири.

«Истанбул маданият ва санъат махсулотлари савдоси» жамияти Истанбул шаҳри мэрияси таркибида давлат хусусий шерикчилик асосида иш юритади ҳамда шаҳар ҳудудидаги бир нечта истироҳат       ва тематик боғлар фаолиятини мувофиқлаштиради. Ушбу объектлардан бири Зейтунбурну туманида жойлашган Топкапы истироҳат боғи ҳудудида жойлашган этнопарк шаклидаги «Турк дунёси маданияти» маҳалласи бўлиб, унда мавжуд 10 дан зиёд бинолар 2009 йилда шаҳар мэрияси томонидан туркий давлатларнинг Истанбулдаги расмий ваколатхоналарига, шу жумладан Ўзбекистон Бош консулхонасига ўз мамлакатлари тарихи ва маданиятини тарғиб қилиш учун ажратилган.

Бош консулхона томонидан «Турк дунёси маданияти» маҳалласида Туркиядаги ватандошлар иштирокида турли тадбирлар ўтказиб келинмоқда.  Хусусан,  ушбу  маҳаллада 2022 йил 26 июнь куни Ўзбекистон Кураш федерацияси билан ҳамкорликда «Ўзбекистон Республикаси Президенти соврини» учун ўзбек миллий кураши бўйича халқаро турнир юқори  савияда ўтказилган.

Учрашувда жамият вакиллари Бош консуллик ходимларига доимий ҳамкорлик учун миннатдорлик билдирдилар. Уларнинг  айтишича, «Турк дунёси маданияти» маҳалласи ҳудудига ҳафтасига 15 минг нафардан зиёд сайёҳлар келади ва туркий давлатлар маданияти билан яқиндан танишади. Меҳмонлар сонини янада кўпайтириш мақсадида ҳозирда маҳалла ҳудудини ободонлаштириш, этнографик ва технологик нуқтаи назардан такомиллаштириш, аҳолини жалб қилувчи турли ижтимоий-маданий тадбирларни кўпайтириш режалаштирилмоқда. Шу сабабли, мамлакатимиз  Бош консулхонаси билан ҳамкорликда Ўзбекистон тарихи ва маданиятини тарғиб қилувчи оммавий тадбирларни кўпроқ ташкил этишга  қизиқиш  билдирилди.

Жамият вакиллари ўтган йил ўтказилган ўзбек кураш бўйича мусобақа «Турк дунёси маданияти» маҳалласи тарихида ўтказилган энг йирик ижтимоий-маданий, оммавий тадбир бўлганлигини  қайд этиш  баробарида Ўзбекистон мустақиллиги  ва  Туркия Республикаси ташкил этилганлигининг юз йиллиги тадбирлари арафасида  ўзбек  кураши бўйича навбатдаги халқаро мусобақани ташкил этиш таклифини  билдирдилар. Ушбу тадбир доирасида икки давлат фуқаролари учун таниқли ўзбек ва турк эстрадалари хонандалари иштирокида концерт дастурини тақдим қилиш, миллий таомлар кўргазмасини ташкил этиш масалалари ҳам муҳокама қилинди.

Учрашув якунида  билдирилган таклифларнинг ташкилий ва техник масалаларини  тегишли  ташкилотлар билан ўзаро келишган ҳолда ҳал этиш бўйича келишиб олинди.