Ўзбекистон ТДТ доирасида Халқаро Ал-Хоразмий ёш математиклар олимпиадасини ўтказиш таклифини илгари сурди

Ўзбекистон ТДТ доирасида Халқаро Ал-Хоразмий ёш математиклар олимпиадасини ўтказиш таклифини илгари сурди

ТОШКЕНТ, 14 июнь. /«Дунё» АА/.  Бугун  Самарқандда  Туркий давлатлар ташкилотига аъзо мамлакатлар таълим  вазирларининг VII учрашуви бўлиб  ўтмоқда, деб  хабар  қилаяпти «Дунё» АА мухбири.

 Мактабгача ва  мактаб  таълими вазири Ҳилола Умарова  тадбирнинг  очилиш  қисмидаги нутқида  ТДТга  аъзо  мамлакатлар ўртасидаги бундай  учрашувлар  2012 йилдан буён  домий тарзда ўтказиб келинаётгани катта аҳамиятга эга  эканлигини таъкидлади.

«Зеро, олдимизда турган масалага ечим топиш, минтақалараро ҳамкорликни ривожлантириш ва туркий оламнинг улкан  салоҳиятини рўёбга чиқариш фақатгина ҳамкорлик орқали амалга ошади. Шубҳасиз, Туркий цвилизациянинг юксалишидаги асосий йўналиш ҳам илм-фандир. Бугунги йиғилиш туркий давлатларнинг таълим соҳасидаги ҳамкорлигини янги босқичга олиб чиқишига ишонаман», деди вазир.

ТДТ Бош котиби Кубанычбек Омуралиев ўз  чиқишида  Ўзбекистонда таълимга катта эътибор қаратилаётганини эътироф этди.

«Охирги марта ТДТ таълим вазирлари учрашуви Истанбулда бўлиб ўтганди. Бугун эса гўзал Самарқандда учрашиб турибмиз. Кеча ва бугун учрашувлар доирасида Туркий давлатлар орасида мактабгача, мактаб ва олий таълим соҳаларини янада ривожлантириш масалаларини муҳокама қилдик. Биз кеча Самарқандда жойлашган таълим муассасаларида ҳам бўлдик. Уларнинг ҳар бири бизда улкан таассурот қолдирди. Биргина Президент мактаблари ғоясини алоҳида таъкидлаб ўтиш жоиз. Ўтган 4 йил давомида бу мактаблар кўрсатаётган натижалар Ўзбекистон таълим тизимининг нақадар юқори кўрсаткичлар қайд этаётганлигини кўрсатиб турибди», деди  ТДТ Бош котиби.

Йиғилиш доирасида кўп томонлама манфаатли ҳамкорликни ривожлантиришга оид лойиҳа ҳамда ташаббуслар муҳокама қилинди.

Учрашувда Ўзбекистон томони Мактабгача таълим соҳасида ЮНЕСКОнинг Тошкент декларацияси ижросини ҳамжиҳатликда амалга ошириш, қардош мактаблар ҳамкорлик дастурини янада ривожлантириш, ТДТ доирасида Халқаро Аль-Хоразмий ёш математиклар олимпиадасини ўтказишни йўлга қўйиш бўйича таклифларни илгари  сурди.