Туркий давлатлар ОAВ ва туроператорлари учун медиа-тур ташкил этилди

Туркий давлатлар ОAВ ва туроператорлари учун медиа-тур ташкил этилди

Хабарингиз бор, шу кунларда Қўқон шаҳрида “Туркий тилли ёшлар” халқаро фестивали бўлиб ўтмоқда.

Анжуман доирасида Халқаро турк маданияти ташкилоти (ТуркСОЙ)га аъзо Туркия, Озарбайжон, Қозоғистон ва Қирғизистон давлатлари оммавий ахборот воситалари вакиллари, сайёҳлик компаниялари ходимлари ва гидлар иштирокида Фарғона вилояти бўйлаб медиа-тур ташкил этилди.  

Тадбир давомида Туркиянинг “ТРТ”, “ТРТ Aваз” телеканаллари ҳамда “Aнадолу” ахборот агентлиги, Қозоғистоннинг “Хабер-24” ва “Aтамекен” телеканаллари, Қирғизистоннинг “Aльянс пресс” ва “Кабер” интернет нашрлари ижодкорлари томонидан мамлакатимизнинг тарихий масканлари, сайёҳлик марказлари ҳақида медиаконтентлар, Фарғона водийси ҳақида қизиқарли материаллар тайёрланди.

Меҳмонлар дастлаб Қўқон шаҳрида жойлашган Худоёрхон ўрдаси, XVIII асрда қурилган тарихий жоме масжиди ҳамда Норбўтабек масжиди билан танишди. Шундан сўнг миллатимизнинг ўзига хос ташриф қоғози ҳисобланган ҳунармандлик, жумладан, ёғоч ўймакорлиги, ипак мато тўқиш ва кулолчилик марказларида бўлишди.

Халқаро медиа-тур иштирокчилари тайёрлаётган ушбу маҳсулотлар мамлакатимизга қардош мамлакатлардан кириб келувчи сайёҳлар сонини оширишга хизмат қилиши шубҳасиз.