Turkiyadan munosabat: "Sharq taronalari" Sharq musiqasi an'analarining boyligi va rang-barangligini jahon auditoriyasiga yetkazishga yordam beradi

Turkiyadan munosabat: "Sharq taronalari" Sharq musiqasi an'analarining boyligi va rang-barangligini jahon auditoriyasiga yetkazishga yordam beradi

SAMARQAND, 27-avgust. /"Dunyo" AA/. Markaziy Osiyo tadqiqotlari xalqaro instituti direktori Evren Rutbil (Turkiya) "Dunyo" AA uchun intervyusida kecha Samarqand shahrida bo'lib o'tgan "Sharq taronalari" xalqaro musiqa festivalining tantanali ochilish marosimi haqidagi o'z taassurotlari bilan o'rtoqlashdi:

– "Sharq taronalari" festivali o'ziga xos muhim voqea, u ellarni ellarga, dillarni dillarga yaqinlashtiradi. Bu nafaqat Markaziy Osiyoning madaniy xilma-xilligi ramzi, balki xalqaro muloqot uchun madaniy platforma hamdir. Ma'lumki, musiqa umumbashariy til bo'lib, tez o'zgarib borayotgan dunyoda bunday festivallar madaniy merosni asrab-avaylash, xalqlar o'rtasidagi o'zaro hamjihatlikni mustahkamlashda muhim o'rin tutadi. Ayniqsa, "Sharq taronalari" jahon tomoshabinlariga globallashuv sharoitida unutilib borilayotgan Sharq musiqasi an'analarining boyligi va rang-barangligini yetkazishda ko'maklashayotgani muhim ahamiyat kasb etmoqda.

Samarqand – tarix, madaniyat va san'at o'zaro bog'langan noyob maskan. Asrlar davomida Ipak yo'lining asosiy markazlaridan biri bo'lgan ushbu qadim kent turli madaniyat va xalqlarning juda ko'p ta'sirini o'zida mujassam etgan. Registon maydonini ko'rish, uning mahobatidan zavq olish har qanday kishini ilhomlantiradi. Bu galgi "Sharq taronalari" turli musiqiy uslublarni o'zida mujassamlashtirgan an'anani davom ettirmoqda, bu bizga tanish janrlar chegarasini kengaytirish imkonini berayotgani yanada ahamiyatlidir.

O'zbek va turk musiqasi ko'plab umumiy xususiyatlarga ega. Bu o'xshashlik nafaqat geografik yaqinlik, balki xalqlarimiz o'rtasidagi tarixiy aloqalar bilan ham izohlanadi.

Mamlakatlarimiz madaniyati boy an'analar to'plamiga ega bo'lib, ularda umumiy mushtaraklikni ko'rish mumkin. Lekin, nazarimda, o'zbek musiqasi yanada jo'shqinroq, bu har bir tinglovchini zavqlantiradi, raqsga tushishga undaydi.