O'zbekistonning iqtisodiy va turizm salohiyati Istanbulda taqdim etildi

O'zbekistonning iqtisodiy va turizm salohiyati Istanbulda taqdim etildi

ISTANBUL, 5-aprel. /"Dunyo" AA/. Mamlakatimiz Bosh konsulxonasi tashabbusi bilan Istanbul shahrida O'zbekistonning iqtisodiy va turizm salohiyatiga bag'ishlangan tadbir tashkil etildi, deb xabar qilmoqda "Dunyo" AA muxbiri.

Unda "Bosfor Global Media" kompaniyasi xodimlari, Silivri tumanidagi Moliya maslahatchilari rivojlanish uyushmasi mutasaddilari, mahalliy va xorijiy tadbirkorlar, nodavlat-notijorat tashkilot vakillari, jurnalistlar va boshqalar ishtirok etdi.

Yig'ilganlar O'zbekistonda yaratilgan qulay ishbilarmonlik muhiti, xorijiy sarmoyadorlarga taqdim etilayotgan imtiyozlar, imkoniyatlar va yengilliklar, shuningdek, yurtimizning turizm salohiyati to'g'risidagi aniq ma'lumotlar bilan tanishdilar.

Samarqand, Buxoro, Xiva, Toshkent, va Qo'qon kabi qadimiy shaharlarimizning boy tarixiy-madaniy merosi, gastronomik, agrar, sport, kosmik, ziyorat va halol turizmi bo'yicha imkoniyatlariga alohida e'tibor qaratildi.

Tadbirda qatnashgan turkiyalik va xorijiy tadbirkorlar mamlakatimizning zamonaviy taraqqiyoti va turizm salohiyatini yuqori baholashdi.

Uchrashuv yakunida ishbilarmon doira vakillari bilan hamkorlik jadallashtirish, qo'shma loyihalarni amalga oshirish va sayyohlar almanishuvini ko'paytirish yuzasidan muzokaralar o'tkazildi.