Turkiyadagi yosh vatandoshlar: Xorijda olgan bilimlarimizni Yangi O'zbekiston taraqqiyotiga safarbar etamiz

ANQARA, 9-iyul. /"Dunyo" AA/. Mamlakatimiz elchixonasi tomonidan 30 iyun – O'zbekiston yoshlari kuniga bag'ishlangan ma'naviy-ma'rifiy tadbir tashkil etildi, deb xabar qilmoqda "Dunyo" AA muxbiri.

Unda Turkiyaning nufuzli oliy ta'lim muassasalarida tahsil olayotgan iqtidorli va faol vatandosh talabalar ishtirok etdi.

O'zbekiston elchisi Ilhom Haydarov tadbirning ochilish qismidagi nutqida vatandosh talabalarni Yoshlar kuni bilan samimiy muborakbod etdi va davlatimiz rahbari tashabbusi bilan 2017-yildan beri har yili 30-iyun sanasi O'zbekistonda yoshlari kuni sifatida keng nishonlanayotganini ta'kidladi. Mamlakatimizda yoshlarning jamiyatdagi o'rni oshirish, yangi avlodni ilm-fan, san'at, sport va innovatsiyalar sohalariga keng jalb etish maqsadida hayotga tadbiq etilayotgan dasturlarga urg'u berildi. 

Shuningdek, xorijda ta'lim olayotgan O'zbekiston yoshlarining qonuniy huquq va manfaatlarini ta'minlash davlatimiz siyosatining ustuvor yo'nalishlaridan biri ekanligi qayd etildi.

Tadbirda so'zga chiqqan yosh hamyurtlarimiz O'zbekiston Prezidenti tomonidan yoshlarga qaratilayotgan yuksak e'tibor uchun minnatdorlik bildirib, xorijda olgan bilimlarini Yangi O'zbekiston taraqqiyotiga safarbar etishlarini ma'lum qildilar.

Bo'lib o'tgan tadbir xorijdagi vatandoshlar bilan tizimli ishlash, ularni mamlakat taraqqiyoti jarayonlariga jalb qilish, milliy madaniyatimizni asrab-avaylash va yoshlar orasida Vatanga sadoqat tuyg'usini mustahkamlashda muhim ahamiyat kasb etdi.