Туркиядаги ёш ватандошлар: Хорижда олган билимларимизни Янги Ўзбекистон тараққиётига сафарбар этамиз

АНҚАРА, 9 июль. /"Дунё" АА/. Мамлакатимиз элчихонаси томонидан 30 июнь – Ўзбекистон ёшлари кунига бағишланган маънавий-маърифий тадбир ташкил этилди, деб хабар қилмоқда "Дунё" АА мухбири.

Унда Туркиянинг нуфузли олий таълим муассасаларида таҳсил олаётган иқтидорли ва фаол ватандош талабалар иштирок этди.

Ўзбекистон элчиси Илҳом Ҳайдаров тадбирнинг очилиш қисмидаги нутқида ватандош талабаларни Ёшлар куни билан самимий муборакбод этди ва давлатимиз раҳбари ташаббуси билан 2017 йилдан бери ҳар йили 30 июнь санаси Ўзбекистонда ёшлари куни сифатида кенг нишонланаётганини таъкидлади. Мамлакатимизда ёшларнинг жамиятдаги ўрни ошириш, янги авлодни илм-фан, санъат, спорт ва инновациялар соҳаларига кенг жалб этиш мақсадида ҳаётга тадбиқ этилаётган дастурларга урғу берилди. 

Шунингдек, хорижда таълим олаётган Ўзбекистон ёшларининг қонуний ҳуқуқ ва манфаатларини таъминлаш давлатимиз сиёсатининг устувор йўналишларидан бири эканлиги қайд этилди.

Тадбирда сўзга чиққан ёш ҳамюртларимиз Ўзбекистон Президенти томонидан ёшларга қаратилаётган юксак эътибор учун миннатдорлик билдириб, хорижда олган билимларини Янги Ўзбекистон тараққиётига сафарбар этишларини маълум қилдилар.

Бўлиб ўтган тадбир хориждаги ватандошлар билан тизимли ишлаш, уларни мамлакат тараққиёти жараёнларига жалб қилиш, миллий маданиятимизни асраб-авайлаш ва ёшлар орасида Ватанга садоқат туйғусини мустаҳкамлашда муҳим аҳамият касб этди.